Öskudagurinn var haldinn hátíðlegur í Fríhöfninni í morgunsárið og verður áfram fram eftir degi. Lífleg stemning var enda margs konar verur á ferli sem skemmtu farþegum sem voru á leið út fyrir landsteinana.

Í tilefni af öskudegi ákváðu starfsmenn Fríhafnarinnar að halda aftur upp á daginn með því að mæta til vinnu í furðufötum, farþegum til mikillar gleði. Var þessi skemmtun sett á fyrir ári og þar sem uppátækið heppnaðist vel var ákveðið að festa þessa hátíð í sessi. Stórir öskupokar hanga úr loftum til að skapa öskudagsstemninguna. Starfsmenn setja mikinn svip á lífið inni í verslun og skemmta bæði sér og farþegum.

Það voru heldur betur litríkir einstaklingar sem mættu til starfa. Þar voru meðal annars sæt hjón frá Hawaii, Bleiki pardusinn og Kleópatra, einnig nornir, hermaður og djöfullinn sjálfur svo eitthvað sé nefnt. Sumir farþegar voru undrandi á þessu nýja yfirbragði á versluninni, aðrir hlógu og skemmtu sér og tóku jafnvel myndir af starfsmönnum. Bleiki pardusinn passaði upp á að veita góða þjónustu í snyrtivörudeildinni, Hawaii-kallinn seldi sælgæti og djöfullinn seldi rauðan varalit. Verða þessar furðuverur á sveimi í Fríhöfninni fyrir hvert flug í dag.

Farþegar í flugstöðinni áttu flug meðal annars til London, Kaupmannahafnar, Óslóar og Stokkhólms og síðdegis verður flogið til Bandaríkjanna eins og tíðkast.