Héraðsdómur Norðurlands Eystra. mbl.is/Skapti

Hæstiréttur hefur fellt úr gildi gæsluvarðhaldsúrskurð Héraðsdóms Norðurlands eystra yfir karlmanni sem grunaður er um tilraun til manndráps. Ástæðan var sú að farið var fram á varðhald á grundvelli rannsóknarhagsmuna en ekki almannahagsmuna.

Héraðsdómur Norðurlands eystra féllst á að maðurinn yrði í gæsluvarðhaldi til 27. febrúar nk. og að hann skyldi sæta einangrun meðan á varðhaldinu stæði.

Um er að ræða mál sem kom upp á Þórshöfn 11. febrúar sl. en maðurinn, sem er rétt yfir tvítugt, braust inn til manns sem fæddur er árið 1941 og veittist að honum. Meðal annars notaði hann munnhörpu sem hnúajárn. Lögregla sagði að um væri að ræða uppgjör áratugagamals máls.

Fórnarlambið hlaut heilablæðingu og mar eða bjúg á heila, en að auki hafi það kinnbeins-, nef- og rifbrotnað og hlotið fjölmarga aðra áverka.

Manninum var sleppt eftir skýrslutöku en í greinargerð sýslumanns segir, að í framhaldi af því hafi alvara málsins komið betur í ljós. Þá segir að þó svo nokkuð sé um liðið frá árásinni sé hún á frumstigi. Þá kemur fram að maðurinn hafi 15. febrúar verið dæmdur í tólf mánaða fangelsi fyrir líkamsárás.

Í dómi Hæstaréttar segir hins vegar að rannsóknin sé langt á veg komin, og því séu ekki lagaskilyrði um rannsóknarhagsmuni uppfyllt í málinu. Því var úrskurðurinn felldur úr gildi og er því maðurinn að nýju laus úr varðhaldi.