Skátarnir Tómas Snær Jónsson og Andrea Dagbjört Pálsdóttir afhjúpuðu í dag minningarskjöld við Skátamiðstöðina að Hraunbæ 123  í tilefni þess að í ár eru 100 ár liðin frá því skátastarf hófst á Íslandi.

22. febrúar er haldinn hátíðlegur af skátum um allan heim, enda fæðingardagur Robert Baden-Powells, stofnanda skátahreyfingarinnar.

Bragi Björnsson, skátahöfðingi, ávarpaði gesti og minntist í ræðu sinni á að skátahreyfingin væri langstærsta alþjóðlega æskulýðshreyfingin, með rúmlega 45 milljónir starfandi félaga.  

„Þetta er einstakur árangur, sérstaklega þegar haft er í huga þær ótrúlegu breytingar og hremmingar sem mannkynið hefur upplifað á þessum hundrað árum“ sagði Bragi og bætti við að líklega hafi aldrei verið meiri þörf fyrir skáta en einmitt nú á tímum örra þjóðfélagsbreytinga, sagði Bragi að því er fram kemur í tilkynningu.

Kjörorð afmælisársins er „Ævintýrið heldur áfram“ og markar afhjúpun minningarskjaldarins upphaf afmælisfagnaðarins sem lýkur formlega 2. nóvember næstkomandi.