Magnús Guðmundsson Eggert Jóhannesson

Lögmaður Magnúsar Guðmundssonar, fyrrverandi forstjóra Kaupþings í Lúxemborg, reiknar með að leggja fram frávísunarkröfu vegna ákærunnar á hendur skjólstæðingi sínum í Al-Thani-málinu. Hann furðar sig á ákæruatriðunum.

Hæstaréttarlögmaðurinn Karl Axelsson er lögmaður Magnúsar Guðmundssonar. Hann segir að skjólstæðingur sinn sé ákærður fyrir hlutdeild í umboðssvikum en það atriði geti engan veginn staðist. Hann segir Magnús ekki hafa komið að lánveitingum til  Sheikh Mohammed bin Khalifa Al Thani, enda hafi hann enga heimild haft til þess. Hans eina aðkoma hafi verið að hitta Al-Thani í Katar þar sem rætt hafi verið um að hann kæmi í einstaklingsþjónustu hjá bankanum.

Slíkt hafi verið alvanalegt fyrir forstjóra Kaupþings í Lúxemborg að gera, þegar um stóra viðskiptavini var að ræða. Þá hafi Magnús verið beðinn um að taka með sér skjöl fyrir Al-Thani að undirrita, en sjálfur hafi Magnús ekki komið að skjalagerðinni. Því sé furðulegt að hann sé ákærður fyrir hlutdeild í umboðssvikum.

Magnús er einnig ákærður fyrir markaðsmisnotkun en lögmaður hans segir það einnig sérkennilegt. Í ákærunni megi finna ákveðnar tilvitnanir vegna þessa ákæruliðar en engin þeirra sé hins vegar tengd Magnúsi. Af þessum sökum verði að öllum líkindum farið fram á að málinu á hendur Magnúsi verði vísað frá dómi.