Hagsmunasamtök heimilanna

Andrea J. Ólafs, formaður stjórnar Hagsmunasamtaka heimilanna, segir samtökin ekki ásaka heila stétt um lögbrot, en sé umhugað um að sýslumenn stígi varlega til jarðar í þeim tilvikum að um er að ræða gengistryggða lánasamninga sem aldrei stóðust lög og síðan afturvirka útreikninga sem heldur ekki standast lög.

Samtökin telja það afar brýnt að öllum aðförum verði hætt á grundvelli gengistryggðra samninga, eða skilmálabreyttra samninga sem áður voru gengistryggðir og því óljóst hver skuld viðkomandi er, segir í tilkynningu.

„Samtökin eru ekki að beina athygli sinni að ógreiddum fasteignagjöldum eða lögboðnum tryggingum en telja þó að gjalda verði varhug við að bjóða upp eignir ofan af fjölskyldum í þeim aðstæðum sem samfélagið býr við núna því vera kann að allur tekjugrundvöllur hafi raskast hjá mörgum í kreppuástandi sem þó mun líða hjá að lokum og fólk geti þá staðið undir bæði fasteignagjöldum, brunatryggingum sem og afborgunum af heimili sínu miðað við réttar forsendur.

HH hafa því lagt það til bæði við efnahags- og viðskiptanefnd í morgun sem og við innanríkisráðherra að allar aðfarir verði settar á bið í því óvissuástandi sem nú ríkir. Eins hafa samtökin lagt það til að innheimta gengistryggðra lána verði sett í ákveðinn farveg með tilmælum, annaðhvort með því að debonera eða greiða ákveðna upphæð á hverja eftirstandandi milljón miðað við að lánið hafi alltaf verið íslenskt að frádregnum höfuðstólsgreiðslum,“ segir í tilkynningu frá Hagsmunasamtökum heimilanna.