mbl.is/Rax

Veðurfræðingur Vegagerðarinnar varar við lúmskri ísingu en í kvöld léttir til og frystir á suðvestan- og vestanverðu landinu.

Í fyrramálið hvessir um tíma af austri sunnanlands og spáð er snörpum vindhviðum undir Eyjafjöllum, 30-40 m/s frá klukkan sex í fyrramálið til klukkan níu og í Öræfasveit skömmu síðar.

Hálkublettir eru nokkuð víða í uppsveitum Suðurlands.

Á Vesturlandi er hálka á Bröttubrekku en snjór og skafrenningur á Holtavörðuheiði. Hálkublettir eru svo á nokkrum leiðum á Snæfellsnesi og hálka er á Fróðárheiði.

Á Vestfjörðum er snjór og skafrenningur á Steingrímsfjarðarheiði og snjór á Þröskuldum. Hálka er á flestum öðrum leiðum á Vestfjörðum og víða skafrenningur.

Um norðvestanvert landið er snjór eða hálka. Á Öxnadalsheiði er snjór og snjókoma og hálka og éljagangur mjög víða norðaustanlands. Nokkur skafrenningur er á Möðrudalsöræfum og á Melrakkasléttu.

Á Austurlandi er hálka á Fagradal, Fjarðarheiði og Oddsskarði og einnig hálka eða hálkublettir á flestum öðrum leiðum.

Á Suðausturlandi eru vegir að mestu orðnir auðir.