Júlíus Vífill Ingvarsson, borgarfulltrúi sjálfstæðismanna. mbl.is

Hjörtur J. Guðmundsson
hjorturj@mbl.is

Sjálfstæðismenn ætla að leggja fram tillögu í borgarráði á morgun þess efnis að Reykjavíkurborg taki upp samstarf við Miðborgina okkar um að gerð verði árleg könnun á nýtingu húsnæðis á Laugaveginum og á þróunarsvæði miðborgar. 

Fram kemur að slík árleg úttekt hafi áður verið gerð af Þróunaráætlun miðborgar, forvera Miðborgarinnar okkar, og hafi gefið mjög góðar upplýsingar um ástand verslunar á svæðinu. Engar upplýsingar liggja hins vegar fyrir í dag um ástandið og því sé borgarfulltrúum ókunnugt um það hvort verslanir séu að vaxa og dafna á svæðinu eða ekki.

Júlíus Vífill Ingvarsson, borgarfulltrúi sjálfstæðismanna, segir að það sé áhyggjuefni ef rekstraraðilar og kaupmenn sjái ekki ástæðu til þess að vera með rekstur við Laugaveginn og í miðborginni. Nauðsynlegt sé að gera úttekt á stöðu þeirra mála og með öllu óviðunandi að ákvarðanir í þeim efnum, til að mynda um gríðarlega hækkun á stöðumælagjöldum, séu byggðar á tilfinningum eða einhvers konar eðlisávísun.

„Við vitum það að í húsnæði víða á Laugaveginum hafa komið inn verslanir sem hafa staldrað stutt við og það er náttúrulega líka áhyggjuefni ef það reynist síðan erfitt að halda slíkum rekstri gangandi að kaupmenn leiti annað eða hætti rekstri. Það gæti bent til þess að þetta sé ekki eins blómleg verslunargata eins og við viljum og vonum að hún sé,“ segir hann

Júlíus segir nauðsynlegt að gera sér grein fyrir því að ef engin verslun væri á Laugaveginum og í miðborginni þá væri ekki það mannlíf til staðar sem fólk vildi sjá. „Þá verður ekki þessi menning, líf og verslun sem auðvitað á að vera í miðborginni.“