Ólafur Ragnar Grímsson. Kristinn Ingvarsson

Nauðsynlegt er að efla rannsóknir á höfunum og auðlindum þeirra, sagði Ólafur Ragnar Grímsson, forseti Íslands í setningarræðu á heimsþingi um höfin í morgun sem haldið er í Singapúr. Hann rakti einnig reynslu Íslendinga af veiðum á grundvelli vísindalegra vísinda og þróun samstarfs á Norðurslóðum.

Heimsþingið sækja um tvö hundruð sérfræðingar í haffræði og sjávarútvegi, forystufólk alþjóðastofnana og alþjóðasamtaka, stjórnendur fyrirtækja og rannsóknarstofnana. Í tilkynningu frá skrifstofu forseta segir að Ólafur Ragnar hafi meðal annars lýst hugmyndum um nýtt alþjóðakerfi um nýtingu sjávarauðlinda, sem byggt gæti á reynslu Íslendinga við nýtingu upplýsingatækni í sjávarútvegi.

Á heimsþinginu verða margar málstofur sem m.a. fjalla um rannsóknir á höfunum, þróun sjálfbærs og arðbærs sjávarútvegs, alþjóðasamvinnu og valdsvið einstakra ríkja, reynsluna af Hafréttarsáttmálanum og þörfina á nýjum samningum um fiskistofna utan lögsögu ríkja, framtíð Norðurslóða og heimskautasvæða sem og áhrif loftslagsbreytinga á höfin.