Vel fór á með þeim Ólafi Ragnari og John Micklethwait, ritstjóra Economist, á ráðstefnunni í Singapúr. Ljósmynd/Forsetavefurinn, forseti.is

Ólafur Ragnar Grímsson, forseti Íslands, sat í dag fyrir svörum hjá John Micklethwait, ritstjóra The Economist, eins áhrifamesta fréttatímarits heims, á ráðstefnu um höfin sem tímaritið efndi til í Singapúr.

Heimsþingið sækja um 200 sérfræðingar í haffræði og sjávarútvegi, forystufólk alþjóðastofnana og alþjóðasamtaka, stjórnendur fyrirtækja og rannsóknarstofnana. Þátttakendur eru einkum frá Evrópu, Asíu og Ameríku.

Líkt og rakið er í tilkynningu á forsetavefnum var Ólafur Ragnar með setningarræðu á fyrri degi þingsins en á morgun, föstudag, verður bankastjóri Alþjóðabankans, Robert Zoellick, aðalræðumaður á síðara degi heimsþingsins. En Alþjóðabankinn sinnir aðallega hagsæld og efnahagslífi í þróunarlöndum.

Vísar til íslensks sjávarútvegs

Á forsetavefnum segir að forsetinn hafi vakið máls á þeim möguleika að Íslendingar leggi sitt á vogarskálarnar til þróunar nýs alþjóðakerfis í sjávarútvegsmálum, þar sem sjálfbærni fiskveiða er í brennidepli.

„Í ræðu sinni fjallaði forseti um nauðsyn þess að efla rannsóknir á höfunum og auðlindum þeirra, rakti reynslu Íslendinga og skipulagningu veiða á grundvelli vísindalegra rannsókna. Einnig fjallaði hann um þróun samstarfs á Norðurslóðum og hvernig íslenskur sjávarútvegur hefur verið frjór jarðvegur fyrir tæknifyrirtæki á ýmsum sviðum. Framfarir í upplýsingatækni hefðu nú gert kleift að starfrækja víðtækt eftirlit með veiðum og vinnslu og styrkja þannig sjálfbæra nýtingu sjávarauðlinda.

Lýsti forseti hugmyndum um nýtt alþjóðakerfi á þessu sviði sem byggt gæti á reynslu Íslendinga við nýtingu upplýsingatækni í sjávarútvegi. Á heimsþinginu verða margar málstofur sem m.a. fjalla um rannsóknir á höfunum, þróun sjálfbærs og arðbærs sjávarútvegs, alþjóðasamvinnu og valdsvið einstakra ríkja, reynsluna af Hafréttarsáttmálanum og þörfina á nýjum samningum um fiskistofna utan lögsögu ríkja, framtíð Norðurslóða og heimskautasvæða sem og áhrif loftslagsbreytinga á höfin.“