Þórhildur Þorleifsdóttir, fyrrverandi fulltrúi í stjórnlagaráði.

Hjörtur J. Guðmundsson
hjorturj@mbl.is

„Hvað það varðar að við komum að þessu aftur þykir mér það alls ekki afleit hugmynd,“ segir Þórhildur Þorleifsdóttir, sem sæti átti í stjórnlagaráði á síðasta ári, en Alþingi ákvað í gær að vísa frumvarpi ráðsins að nýrri stjórnarskrá aftur til þess til umfjöllunar. Stjórnlagaráð hefði opnað á það að koma aftur á málið yrði óskað eftir því þegar það lauk störfum síðastliðið sumar.

„En það sem mér finnst skrítið við að koma að málinu aftur er að ég veit í rauninni ekki um hvað málið snýst,“ segir Þórhildur en hún gerir ráð fyrir að mæta á boðaðan fund stjórnlagaráðs 8. - 11. mars næstkomandi. Alls óvíst er þó hversu margir af þeim 25 einstaklingum sem skipuðu ráðið sjái sér fært að mæta en einhverjir þeirra hafa þegar boðað forföll sín.

Þórhildur segir þannig mjög óljóst hvað ætlast sé til að stjórnlagaráð geri á fundinum í mars og það sé bæði áfellisdómur yfir Alþingi og þeim sem hafi gagnrýnt frumvarp ráðsins. „Ég vona þó að það eigi eftir að koma í ljós.“

Hún segir það ennfremur tilfinningu sína að ýmsir séu að fara í kringum málið eins og kettir í kringum heitan graut og séu hikandi við að taka á málinu. Þá bæði á Alþingi og utan þess. Hún segist ekkert sjá að því að stjórnlagaráð fjalli aftur um málið og þá gagnrýni sem fram hafi komið á frumvarp þess ef um er að ræða gagnrýni sem eigi rétt á sér og sé vel rökstudd.

„Þá finnst mér ekkert að því að við séum reiðubúin að líta á eigin verk. Skárra væri það nú ef ekki væri hægt að finna agnúa á þessu. Það kann vel að vera að svo sé. Við kannski litum aldrei svo á að þetta væri höggvið í stein,“ segir Þórhildur. Stjórnlagaráð muni þá væntanlega skoða það sem lagt verði fyrir það og taka afstöðu til þess.

Þórhildur tekur hins vegar undir gagnrýni á að þingið hafi ekki komist að efnislegri niðurstöðu um frumvarpið. „Þingmennirnir geta ekkert leyft sér að láta sér vaxa þetta í augum. Valdið liggur þar og þeir verða að mynda sér skoðun á þessu. En kannski voru þeir allir búnir að því fyrirfram og þurfa ekki að lesa þetta?“ spyr hún að lokum.