Samspil hálku og hvassviðris varð til þess að rúta með átta manns innanborðs valt út af veginum við Oddsskarðsgöng í kvöld. Að sögn Jónasar Wilhelmssonar, yfirlögregluþjóns á Eskifirði, fór rútan eina þrjá hringi og má þakka fyrir að bíllinn var vel búinn og menn í öryggisbeltum.

Rútan fauk út af þar sem kallað er Sandskeið, um kílómetra ofan við Eskifjörð, á stað þar sem gjarnan eru miklar hviður að sögn Jónasar. „Hún veltur svona niður vegaröxl. Ég gat nú ekki gert neinar mælingar á því hvað hún fór langt, það var kolvitlaust veður, en hún fer þrjár veltur að minnsta kosti,“ segir Jónas.

Því er ljóst að þakka má fyrir að farþegar sluppu allir með minniháttar meiðsl. Þeir voru sendir á heilsugæsluna á Eskifirði til eftirlits en einn fluttur á sjúkrahúsið á Norðfirði til öryggis. Jónas segir það hafa skipt miklu máli að rútan, sem var frá Austfjarðaleið, hafi verið vel búin og farþegar í bílbeltum.

Veðrið er nú dottið niður að sögn Jónasar og vegurinn um Oddsskarð hefur verið opnaður að nýju, en rútan bíður utan vegar í nótt. „Við bíðum bara þangað til í fyrramálið, þá getum við athafnað okkur í birtu og séð þetta almennilega,“ segir Jónas.

Mennirnir í rútunni voru á leið á vakt í álverinu á Reyðarfirði. Samkvæmt upplýsingum mbl.is var unnt að kalla inn bakvakt svo starfsemin yrði ekki fyrir röskun.