Myndarlegur selur heldur til við skútubryggjuna á Ísafirði. Mynd/bb.is

Segja má að nýr hafnarvörður sé tekinn til starfa við skútubryggjuna á Ísafirði en þar hefur myndarlegur selur haldið sig síðustu daga. Selurinn tekur lífinu með ró og kippir sér lítið upp við umferð mannfólksins á höfninni.

Þá fannst honum ekkert tiltökumál að ljósmyndari vefsins myndaði hann í morgun. Þess má geta að talningar á fjölda landsela við Íslandsstrendur fóru fram í júlí til september síðastliðinn á vegum Selaseturs Íslands. Talningin var sú viðamesta sem ráðist hefur verið í til þessa en hún fór þannig fram að flogið var yfir alla landshluta allt að þrisvar sinnum og var fjöldi sjáanlegra landsela talin í öllum látrum, segir í frétt á vef Bæjarins besta. 

Að meðaltali sáust um 4.512 landselir, en sú tala er mitt á milli talningarniðurstöðu áranna 2003 og 2006. Þrátt fyrir sí minnkandi veiðar landsela benda niðurstöðurnar til að landselsstofninn hafi ekki rétt úr kútnum síðan árið 2003. Skýringar á því geta verið margvíslegar, meðal annars er líklegt að slysaveiðar á sel í fiskinet hafi neikvæð áhrif á landselsstofninn.