mbl.is/Arnaldur

Hagsmunasamtök heimilanna (HH) áttu fund með efnahags- og viðskiptanefnd í gær þar sem rætt var um nýfallinn Hæstaréttardóm og hvernig beri að meðhöndla gengistryggð lán og áður gengistryggð lán á grundvelli hans. HH halda því fram að mögulega eigi neytendur betri rétt en þann sem kemur fram í þeim dómum sem fallnir eru ef litið er til laga um neytendalán og Evróputilskipana.

Á fundinum lögðu samtökin áherslu á að rétt væri að stöðva allar aðfarir og öll innheimta yrði fryst eða til þess mælst að fólk „deboneri“ greiðslum, eða þær settar í einhvern lágmarksfarveg í þeim tilfellum þar sem augljóst er að fólk skuldar ennþá stórar fjárhæðir, en ekki ríkir óvissa um hvort bankinn sé í vanskilum við lántakendur.

„Ólíklegt gæti talist að lántakendur teldust í vanskilum við lánveitanda sem gert hefði ólöglegan samning og síðan sent þeim ólöglega endurútreikninga sem óeðlilegt væri að ætlast til að standa skil á miðað við algjörlega brostnar forsendur. Þá lögðu fulltrúar samtakanna til að dómsmál til að leysa úr fleiri ágreiningsefnum fengju flýtimeðferðir innan kerfisins og í þeim þyrfti ráðgefandi álits EFTA dómstólsins. Þótt gerðardómur komi nú til greina af hálfu fjármálafyrirtækja og hafi verið lagður til af hálfu Talsmanns neytenda, þá telja samtökin alls ekki hægt að skuldbinda neytendur endanlega með gerðardómi ef þeir telja sig eiga betri rétt, slíkur dómur myndi eingöngu ná til þeirra sem samþykktu að gangast undir hann,“ segir í tilkynningu Hagsmunasamtakanna.

Samtökin viðruðu hugmyndir sínar um eignarnám lánasafna og að ríkið þyrfti ekki síður að óttast skaðabótaskyldu gagnvart neytendum heldur en fjármálafyrirtækjum. Var í því samhengi bent á að sé neytanda veittur ýtrasti réttur í vafaatriðum þá sé ekki um neina skaðabótaskyldu að ræða því það sé einfaldlega lögum samkvæmt. Varla getur það verið tjón að fylgja lögum, segir í tilkynningu samtakanna.

Þá vildu samtökin að þingmenn tryggðu sjálfvirka endurupptöku mála - án þess að fólk þyrfti að sækja sér þann rétt sérstaklega og að skila þyrfti eignum til fólks og síðan tryggja skaðabætur fyrir þá sem hafa nú þegar misst eignir sínar.

Að lokum lögðu samtökin til að SFF, Samtök fjármálafyrirtækja, yrði leyst upp með tilliti til þess að þar væri um grundvöll fyrir óheilbrigðan og skaðlegan samráðsvettvang, segir í tilkynningu.