Spáð er hríðaveðri á fjallvegum í kvöld. mbl.is/Þorkell Þorkelsson

 Vaxandi hríðarveður er á flestum fjallvegum á Vestfjörðum og Norðurlandi. Gera má ráð fyrir þéttri ofankomu og skafrenningi austanlands fram á nótt s.s. á Oddsskarði og Fjarðarheiði. Á láglendi nær hins vegar víðast að hlána í dag. Þetta kemur fram í upplýsingum frá Vegagerðinni.

Hálka og skafrenningur er  á Hellisheiði og hálkublettir í Þrengslum. Þæfingsfærð og skafrenningur er á Kjósarskarðsvegi.  Á Lyngdalsheiði og á efri hluta Biskupstungnabrautar er hálka  en annars víða hálkublettir í uppsveitum Suðurlands. Snjóþekja er á Sólheimasandi og austur að Vík í Mýrdal.

 Á Vesturlandi er hálka á Fróðárheiði, Holtavörðuheiði og Svínadal en hálka og skafrenningur á Bröttubrekku. Hálkublettir eru einnig  á nokkrum leiðum vestanlands.

 Á Steingrímsfjarðarheiði og Þröskuldum er hálka og skafrenningur og hálka á flestum öðrum leiðum á Vestfjörðum.

Þæfingsfærð  og skafrenningur er á Klettshálsi en unnið að hreinsun.

 Norðvestanlands  er hálka  eða hálkublettir á flestum aðalleiðum en snjóþekja á nokkrum fáfarnari leiðum.

Norðaustanlands er hálka og snjóþekja á vegum og skafrenningur á Melrakkasléttu. Á Hólasandi er þæfingsfærð og skafrenningur.

 Á Austurlandi er hálka og hálkublettir á flestum leiðum. Þæfingsfærð er þó á Vatnsskarði eystra og snjóþekja  í Berufirði og milli Hvalness og Kvískerja.

 Á Suðausturlandi er að mestu autt vestan Kvískerja en snjóþekja þar fyrir austan.