Konan tók þátt í kvennahlaupinu sem einnig var haldið á Spáni. Heiðar Kristjánsson

Hæstiréttur hefur viðurkennt bótarétt konu úr hendi Vátryggingafélags Íslands vegna slyss sem hún varð fyrir í vinnuferð á Spáni í júní 2008. Konan var að stökkva yfir lítið fráleggsborð þegar hún missti jafnvægið.

Með dóminum er snúið við niðurstöðu Héraðsdóms Reykjavíkur frá því í apríl í fyrravor. Taldi héraðsdómur engar vísbendingar um að konan hefði fallið eða hrasað vegna utanaðkomandi atburðar, og yrði því að líta þannig á að svo hefði ekki verið.

Af þeim sökum falli slysið ekki undir 8. gr. vátryggingaskilmála en þar segir að með hugtakinu slys sé átt við skyndi­legan utanaðkomandi atburð sem valdi meiðslum á líkama þess sem vátryggður er og gerist án vilja hans.

Aðdragandi slyssins var að konan tók þátt í skemmtiskokki en því lauk með að hlaupinn var hringur í kringum sundlaugina á hótelinu þar sem hún bjó á meðan dvölinni á Spáni stóð. Í hlaupinu kringum sundlaugina tók konan þá ákvörðun að stökkva yfir lítið fráleggsborð á sundlaugarbakkanum, en í stökkinu missti hún jafnvægið og féll við.

Samkvæmt vottorði bæklunarskurðlæknis rifnaði við slysið fremra krossband í hnénu, auk þess sem brjósk skemmdist töluvert í því innanverðu.

Hæstiréttur sagði tryggingafélagið ekki hafa byggt á því að fall konunnar mætti rekja til svima, eða öðru leyti til sjúkdóma eða annars innra ástands í líkama hennar. Var því fallist á að líkamstjónið hefði hlotist af skyndilegum utanaðkomandi atburði.