mbl.is

Um kl. 22.23 í gærkvöldi fékk lögreglan tilkynningu um að maður væri upp á þaki á húsi við Írabakka. Þóttu sjónvarvottum aðfarir mannsins með ólíkindum en mjög hált var á þakinu enda kalt í veðri.

Sást til mannsins sveifla sér niður á svalir og fara þar inn um svalahurð.  Þegar að var gáð kom í ljós að þarna var mjög drukkinn íbúi að koma sér inn þessa  óhefðbundnu leið.  Mildi að ekki fór ver. 

 Klukkan 22:30 í gærkvöldi fór lögregla inn á veitingastað við Smiðjustíg til eftirlits en þar hafði verið auglýst „bjórkvöld“ og einn framhaldsskólinn orðaður við þá „skemmtun“.   Farið var yfir þær reglur sem gilda um skemmtanahald ungmenna með starfsfólki staðarins og tókst með ágætum samvinna við það.  Kom upp nokkur tilvik þar sem ungmenni undir aldri komu við sögu en heilt yfir fór skemmtunin vel fram. 

Lögreglan hafði í nógu að snúast í nótt.

Um klukkan 00:40 var lögregla kölluð til að veitingastað við Austurvöll.  Þar var ofurölvi stúlka undir aldri.  Vegna ástands hennar var hún færð á slysadeild í Fossvogi.  Var og haft samband við foreldra hennar.

Um hálf tvö í nótt var bifreið stöðvuð í Tryggvagötu og ökumaður grunaður um ölvun við akstur.  Við athugun á vettvangi reyndist hann undir mörkum og var því látinn hætta akstri.   

Klukkan  01:31 var lögregla kölluð til vegna hávaða í samkvæmi í húsi við Einihlíð.  Er lögregla mætti á vettvang vöknuðu grunsemdir þeirra um að fíkniefni kæmi þarna við sögu.  Farið var inn í íbúðina þegar staðfesting fékkst og voru efni haldlögð.  Málið afgreitt samkvæmt reglum þar um. 

Um kl. 2 höfðu lögreglumenn afskipti af fólki sem sat í kyrrstæðri bifreið í Tryggvagötu.  Grunur vaknaði um að fíkniefni væri í bifreiðinni og eftir heimilaða leit fundust fíkniefni.  Málið afgreitt á vettvangi með skýrslu.