Fjölmargir ná ekki endum saman lengur mbl.is/Arnaldur Halldórsson

Marinó G. Njálsson, sem hefur lengi barist fyrir hagsmunum heimilanna, segir á bloggvef sínum að hann viti ekki hversu margir þeirra sem hafi haft samband við hann hafi íhugað að taka eigið líf vegna skulda sinna við fjármálastofnanir.

Í færslunni segir hann frá athugasemdum sem sextug kona ritaði inn á blogg hans þar sem hún íhugar að taka eigið líf þar sem hún sjái ekki fram á að geta staðið við skuldbindingar sínar.

„Ég veit ekki hvað þær eru orðnar margar svona sendingarnar sem ég hef fengið. Sú fyrsta barst í febrúar 2009.  Sú kona er enn á lífi, en baráttuna við bankann sinn hefur hún háð þindarlaust þessi þrjú ár.  Er þetta eitthvert líf?  Eru peningar fjármálafyrirtækjum svo mikils virði að þau gleyma að viðskiptavinirnir eru af holdi og blóði,“ skrifar Marinó. 

Hann skorar á Dróma að fara í gegnum bækur sínar og finna konuna sem hann nafngreinir sem Hönnu,  sem tók lán hjá SPRON árið 2005 og koma til móts við hana. 

„Aldrei ætla ég að voga mér að segja fjármálafyrirtækin bera ábyrgð þegar fólk tekur líf sitt, en þau eru hluti af því umhverfi sem margt örvæntingarfullt fólk er í.  Ekki bara það, viðbrögð fjármálafyrirtækjanna auka oft á örvæntingu fólks.

Til allra fjármálafyrirtækja:  Sýnið manngæsku, sýnið skilning, sýnið auðmýkt!  Þið munið hagnast á þessu þegar fram líða stundir,“ skrifar Marinó.