Arve-Olav Solumsmo segir fólk frekar taka praktískar og skynsamlegar ákvarðanir á erfiðum tímum. mbl.is/Kristinn

„Heimurinn þarf að færast fram á við því hann hefur ekkert annað að fara,“ hefur Arve-Olav Solumsmo eftir norskum grínista og segir það sama eiga við um heilbrigðisþjónustu.

Solumsmo starfaði sem yfirmaður samráðs- og kynningarmála við sjúkrahúsið í Þrándheimi um sjö ára skeið en þar hefur nýtt sjúkrahús risið á grunni þess gamla síðastliðin tíu ár, líkt og nú stendur til í Reykjavík. Solumsmo flutti erindi á samráðsþingi byggingarnefndar nýs Landspítala í gær.

„Spurningin er ekki hvort það eigi að byggja nýjan spítala, heldur hvenær og hvar. Það er ekki möguleiki að gera ekki neitt og með því að viðhalda gömlu byggingunum er í raun bara verið að endurbyggja gamla spítalann,“ segir Solumsmo í Morgunblaðinu í dag um fýsileika þess að reisa nýtt sjúkrahús.

Hann segir að sífellt erfiðara verði að laga gömlu byggingarnar að nýjum og breyttum væntingum og þjónustuþörf og bendir á að hvað varðar fjárhagslegu hliðina þá sé að mörgu leyti ákjósanlegt að byggja á erfiðum tímum.