Lilja Mósesdóttir alþingismaður. mbl.is/Ómar Óskarsson

Þingmenn ræddu um innheimtuaðgerðir lánastofnana í dag og sögðu að þær bentu helst til þess að engir dómar hefðu fallið um gengistryggð lán. Efnahags- og viðskiptanefnd fundar með fjármálastofnunum og Fjármálaeftirlitinu vegna þessa í dag. Lilja Mósesdóttir sagði að tími væri til kominn að Alþingi sýndi samstöðu með venjulegu fólki.

Helgi Hjörvar, formaður efnahags- og viðskiptanefndar, sagði í umræðum um störf þingsins á Alþingi í dag að mikilvægt væri að sýslumannsembætti um allt land tryggðu að allir byggju við sama réttaröryggi hvað gengistryggð lán snerti.

Helgi sagði áhöld um þær aðferðir sem notaðar hefðu verið við innheimtu og mikilvægt væri í þessu sambandi að skoða hvort verið væri að fara á svig við lög í þessum efnum. 

Efnahags- og viðskiptanefnd mun síðar í dag funda um þetta efni með Fjármálaeftirlitinu og fjármálastofnunum.

Guðlaugur Þór Þórðarson, þingmaður Sjálfstæðisflokksins,  sem sæti á í nefndinni segir að sér virðist sem fjármálafyrirtækin sendi út greiðsluseðla sína eins og enginn dómur hafi fallið um ólögmælti gengistryggðra lána.

„Því verður ekki trúað að fjármálafyrirtæki láti eins og enginn dómur hafi fallið. Ég trúði því ekki að þetta væri staðan,“ sagði Guðlaugur Þór og sagðist vona að fundurinn í dag yrði til þess að einhver breyting yrði á.

Skúli Helgason, þingmaður Samfylkingar, tók einnig þátt í umræðunni og sagði að á meðan verið væri er að skera úr um hvaða fordæmisgildi þessi dómur hefði væri það hlutverk Alþingis að koma í veg fyrir að harkalegum innheimtuaðgerðum væri beitt og að  Alþingi bæri að standa vörð um lántakendur.

„Ég óttast að upp úr sjóði um mánaðamótin þegar þeir sem tóku gengistryggð lán fá greiðsluseðla eins og enginn dómur hafi fallið,“ sagði Lilja Mósesdóttir alþingismaður. Hún sagðist hafa heyrt það frá lántakendum að bankar neituðu  að afhenda skjöl „sem sýna fólki hvað það á inni hjá bankanum“.

„Við getum ekki beðið hér eftir því að málið leysist af sjálfu sér,“ sagði Lilja. Hún sagði að Alþingi yrði að hafa milligöngu hjá lántakendum og lánveitendum að finna lausn á málinu og að hraða þyrfti vinnslu frumvarpa sem heimila fólki að skila inn lyklum að húsum sínum. „Sýnum samstöðu með venjulegu fólki í landinu,“ sagði Lilja.