Húsleitir í Lúxemborg
Lúxemborg mbl.is/Ómar Óskarsson
Þrjátíu manna hópur á vegum sérstaks saksóknara gerði í dag húsleit hjá Landsbankanum í Lúxemborg. Níu mál eru til rannsóknar sem snúa að markaðsmisnotkun og umboðssvikum. Greint var frá þessu í fréttum Stöðvar 2.
Aðgerðirnar hófust í Lúxemborg klukkan sjö í morgun að íslenskum tíma og lauk undir kvöld.
Leitað var á skrifstofum Landsbankans í Lúxemborg og á skrifstofum tveggja fyrirtækja í Lúxemborg sem tengjast bankanum. 24 sérfræðingar frá lögreglunni í Lúxemborg tóku þátt í aðgerðinni ásamt sex starfsmönnum sérstaks saksóknara.
Að sögn Ólafs Þórs Haukssonar, sérstaks saksóknara, er aðgerðum nú lokið í Lúxemborg en í kjölfar húsleitar í húsnæði Landsbankans í Lúxemborg var ákveðið að fara á tvo aðra staði í borginni þar sem talið væri að gögn væri að finna sem tengjast málinu. Þeirri vinnu hafi lokið undir kvöld.
Ólafur segir í samtali við mbl.is að húsleitirnar í dag tengist málum tengdum Landsbankanum sem byrjað var að rannsaka í janúar 2011 er starfsmenn embættis sérstaks saksóknara gerðu húsleitir á Íslandi og handtóku fyrrum starfsmenn Landsbankans sem í kjölfarið voru úrskurðaðir í gæsluvarðhald.
Í fréttum Stöðvar 2 kom fram að rannsóknin snúi í fyrsta lagi að meintri markaðsmisnotkun Landsbankans með hlutabréf útgefin af bankanum sjálfum.
Í öðru lagi lánveitingar félaganna Hunslow S.A, Bruce Assets Limited, Pro-Invest Partners Corporation og Sigurðar Bollasonar ehf. til að kaupa á hlutabréfum í Landsbankanum.
Hunslow er í eigu Stefáns Ingimars Bjarnasonar og fékk 1,6 milljarða króna lán til að fjármagna hlutabréfakaup í Landsbankanum. Bruce Assets var í eigu bræðranna Ólafs Steins og Kristjáns S. Guðmundssona og fékk lán í sama tilgangi. Sigurður Bollason ehf. í var eigu athafnamannsins Sigurðar Bollasonar og fékk 3,5 milljarða króna lánaða til að kaupa bréf í Landsbankanum.
Félagið Pro-Invest var í eigu Georg Tzvetanski, en um er að ræða búlgarskan viðskiptafélaga Björgólfs Thors Björgólfssonar sem fékk 4,5 milljarða króna yfirdráttarlán hjá Landsbankanum í Lúxemborg í lok september 2008, aðeins viku fyrir hrun.
Í þriðja lagi er um ræða kaup Landsbankans á lánasafni Landsbankans í Lúxemborg og síðasta af þessum fjórum tengist kaupum á hlutabréfum í bankanum af hálfu félaga sem héldu um kauprétti starfsmanna Landsbankans og lánveitingar bankans til þessara sömu félaga.
Heildarupphæðin, sem Landsbanki Íslands reiddi fram til þess að kaupa lánasafnið af Landsbankanum í Lúxemborg, sem er til rannsóknar hjá sérstökum saksóknara, nam um 784 milljónum evra, að því er fram kemur í skýrslu rannsóknarnefndar Alþingis. Þetta er jafnvirði um 130 milljarða króna, að því er fram kom í fréttum Stöðvar 2 og hægt er að lesa um á Vísi.
