Hæstiréttur hefur staðfest dóm Héraðsdóms Reykjavíkur yfir karlmanni sem var dæmdur í átján mánaða fangelsi fyrir nauðgun að öðru leyti en því að til frádráttar refsingu kemur gæsluvarðhald hans frá 3. til 7. maí 2011.
Maðurinn sem er fæddur árið 1981 var í héraði sakfelldur fyrir nauðgun með því að hafa veist að stúlku þar sem hún var að hafa þvaglát utandyra á Austurvelli í maí í fyrra og sett tvo fingur í endaþarm hennar henni að óvörum. Var honum einnig gert að greiða stúlkunni 700 þúsund krónur í miskabætur.
Maðurinn játaði fyrir héraðsdómi að hafa veist að konunni en hafnaði því að um væri að ræða nauðgun. Héraðsdómur taldi hins vegar að háttsemi mannsins teldist vera kynferðismök í skilningi almennra hegningarlaga og sakfelldi hann fyrir nauðgun. Á það féllst Hæstiréttur einnig.
Er honum gert að greiða allan áfrýjunarkostnað málsins, 402.442 krónur.