Ef fram heldur sem horfir munu 15.000 kínverskir ferðamenn koma til landsins á næsta ári eða um þrefalt fleiri en á árinu 2010. Ársæll Harðarson, svæðisstjóri Icelandair í Asíu, spáir þessu en hann áætlar að hingað komi 12.000 kínverskir ferðamenn í ár.
Fram kemur í nýrri áætlun Arion banka að erlendir ferðamenn eyði nú sem svarar um 152.000 krónum í ferðalög hér á landi. Sé sú tala margfölduð með 12.000 má ætla að kínverskir ferðamenn verji um 1,8 milljörðum kr. í ferðir til Íslands í ár.
Ársæll telur að hlutur Kínverja í ferðaþjónustu á Íslandi eigi eftir að vaxa hraðar en flestra annarra þjóða. Bakslag hafi komið í bókanir í sumarbyrjun og rekur hann það til mótmæla Kínastjórnar gegn þeirri ákvörðun norsku nóbelsnefndarinnar að veita kínverska andófsmanninum Liu Xiaobo friðarverðlaun Nóbels í hittiðfyrra. En Kínastjórn meinaði Liu að taka við þeim.
Ársæll telur að bakslagið sé tímabundið og að Kínverjar muni halda áfram að sækja til Norðurlanda en sneiða hjá Noregi vegna málsins.