Innlent | mbl | 6.7.2012 | 0:25 | Uppfært 9:49

Hvítabjörn á sundi?

Mynd 1 af 3 Hér gefur að líta ljósmynd sem ítölsku ferðamennirnir tóku og lögreglan er að skoða. Í sjónum sést dökkur blettur fyrir miðri mynd sem talið er sé ísbjörn.

Mynd 2 af 3 Ferðamennirnir fylgdust með dýrinu í sjónauka og fullyrða að um hvítabjörn hafi verið að ræða, en ekki sel. Þau segja að selir hafi verið í nágrenninu. Þetta hafði Morgunblaðið eftir heimildum í gærkvöldi.

Mynd 3 af 3 Þetta telja ítölsku ferðamennirnir að sé mynd af ísbirni á sundi við Vatnsnes.

Ljósmyndir sem ítalskir ferðamenn tóku á miðvikudag af dýri sem þeir telja að hafi verið hvítabjörn hafa verið birtar. Lögreglan hefur náð tali af ferðamönnunum, en líkt og fram hefur komið komu þeir auga á björninn við Vatnsnes í gær. Ekkert hefur hins vegar sést af birninum í dag þrátt fyrir mikla leit.

TF-LIF, þyrla Landhelgisgæslunnar, tók þátt í leitinni, bæði í gær og í fyrradag. Hún sneri aftur til Reykjavíkur síðdegis í gær, fimmtudag.

Landhelgisgæslunni barst á miðvikudag kl. 16:55 beiðni frá fjarskiptamiðstöð lögreglunnar um aðstoð þyrlu eftir að óstaðfestar fregnir bárust af hvítabirni á sundi við Vatnsnes.

Þegar þyrlan kom á svæðið var fljótlega lent við Geitafell þar sem för sáust í sandinum sem talin voru vera eftir bjarndýrið. Var í framhaldinu leitað ítarlega um Vatnsnes án árangurs.

Í gærmorgun var farið að nýju í loftið og leitað með strandlengjunni frá Skaga inn Húnafjörð, yfir Þingeyrasand og fyrir Vatnsnes. Var síðan haldið áfram alveg vestur um og norður í Bjarnafjörð á Hornströndum.