Héraðsdómur Reykjavíkur hefur dæmt ríkið til að greiða fyrirtækinu Innnes ehf. 376 þúsund krónur vegna reglugerðar sem landbúnaðarráðuneytið setti um tollkvóta á innfluttu kjöti. Álagning tollsins var andstæð lögum að mati dómsins.
Innnes ehf. stundar m.a. innflutning á matvörum í atvinnuskyni. Í desember 2011 flutti fyrirtækið inn 691 kg af kjúklingabringum frá Danmörku. Sendingin var tollafgreidd og greiddi Innnes 149,44% toll samkvæmt úthlutuðum tollkvóta á grundvelli reglugerðar nr. 558/2011 um úthlutun á tollkvótum vegna innflutnings á nautgripa-, svína- og alifuglakjöti.
Jón Bjarnason fyrrverandi landbúnaðarráðherra setti þessa reglugerð eftir að hann varð ráðherra, en með henni var breytt þeirri aðferð sem hafði verið notast við þegar tollur var lagður á innflutta kjúklinga. Í stað þess að miða við svokallaðan magntoll var miðað við verðtoll.
Ef miðað hefði verið við magntoll hefði Innnes þurft að greiða 384.887 kr. í toll af kjúklingabringunum, en ekki 760.986 kr. eins og fyrirtækið varð að gera eftir að reglugerðinni hafði verið breytt.
Jafnframt tóku ráðuneytið ákvörðun árið 2009 um að úthluta engum „WTO-tollkvótum“ það ár. Ráðuneytið rökstuddi þessa ákvörðun með þeim hætti, að vegna stöðu gengis krónunnar og hækkunar á innflutningsverði landbúnaðarvara væru ekki forsendur til að úthluta sérstaklega WTO-tollkvótum.
Í dómnum eru gerðar margvíslegar athugasemdir við ákvörðun landbúnaðarráðherra. Bent er á að ekki megi breyta skattlagningu nema með lögum, og vísað er þar til fordæmis í dómum Hæstaréttar.
Í dómnum segir að tollalög verði ekki skilin á annan hátt en að ráðherra sé árlega skylt að leyfa innflutning á a.m.k. 59 tonnum á kjöti úr alifuglum.
Ríkið þarf því að endurgreiða Innnes 376.099 krónur með vöxtum vegna þess að það lagði á of háan toll. Jafnframt þarf ríkið að greiða Innnes 950.000 kr. í málskostnað.
Þess má geta að eftir að Steingrímur J. Sigfússon tók við landbúnaðarráðuneytinu af Jóni Bjarnasyni var reglugerðinni breytt og jafnframt auglýstir lágmarkstollar í samræmi við skuldbindingar Íslands í WTO-samningnum.