Snorri Páll Jónsson, einn níumenninganna sem sýknaðir voru af árás á Alþingi, segir það ekki rétt að ætlunin hafi verið að yfirtaka Alþingi eins og Geir Jón Þórisson fv. yfirlögregluþjónn hélt fram á fundi í Valhöll í dag.
„Mér finnst nú rétt að benda á það að í sýknudómi yfir okkur kemur fram að ekkert benti til þess að við ætluðum að yfirtaka þingið. Eini tilgangur okkar var að komast á þingpalla til þess að viðra skoðanir okkar á ástandinu í þjóðfélaginu á þessum tíma,“ segir Snorri Páll Jónsson, einn níumenninganna sem ruddust inn í Alþingishúsið 8. desember 2008.
Geir Jón Þórisson fv. yfirlögregluþjónn sagði á fundi í Valhöll í dag að „árásin“ á þingið hafi verið einn alvarlegasti atburður mótmælanna. Telur hann að markmið níumenninganna hafi verið að yfirtaka þingið.
„Þetta dómsmál snerist aldrei um neitt annað en að við ætluðum að fara á þingpalla. Svo segir í sjálfri ákærunni frá saksóknara. Að halda einhverju öðru fram er alrangt,“ segir Snorri.
„Fyrir mér er þetta tilraun til sögusköpunar sem ekki er rétt,“ segir Snorri.
Sjá einnig: Hefðu yfirtekið þingið