Innlent | mbl | 25.10.2012 | 16:07 | Uppfært 18:38

Margfaldur verðmunur

Starfsfólk OR ber reglulega saman þennan kostnað heimilanna og var nýjasti samanburður gerður nú í október. Súluritið sýnir kostnað í krónum á ári.

Orkuveita Reykjavíkur segir að samanburður á kostnaði heimila við veituþjónustu og á orkuverði í höfuðborgum Norðurlanda leiðii í ljós að árleg útgjöld þriggja manna fjölskyldu, miðað við algenga notkun hér á landi, séu langlægst í Reykjavík. Heildarkostnaðurinn nemi um 218.000 kr. á ári.

Næst komi Helsinki með liðlega tvöfalt meiri kostnað og þá Osló og Stokkhólmur með um þrefaldan orku- og veitukostnað. Kaupmannahöfn skeri sig úr en kostnaðurinn við þennan þátt heimilisrekstursins nálgist það að vera ferfaldur miðað við Reykjavík.

Þetta megi sjá í töflunni hér fyrir neðan.

	Reykjavík	Kaupm.höfn	Stokkhólmur	Osló	Helsinki
Rafmagn	76.170	234.812	137.491	109.723	110.363
Húshitun	76.375	346.228	439.680	344.151	273.372
Kalt vatn	25.059	106.173	31.492	90.048	49.421
Fráveita	40.158	105.507	34.517	76.165	60.554
Alls	217.762	792.720	643.181	620.087	493.709

Fram kemur að samanburðurinn sé gerður með þeim hætti að farið sé í verðskrár stærstu veitufyrirtækja og orkusala í hverri borg og miðist forsendurnar við algeng þjónustukaup þriggja manna fjölskyldu í 100 fermetra íbúð. Raforkuverð sveiflist gjarna meira á Norðurlöndum en hér á landi og sé miðað við tilboð fyrirtækja um fast verð í a.m.k. eitt ár.

Nánar á vef OR.