Innlent | mbl | 28.1.2013 | 12:13 | Uppfært 21:11

Eigum ekki að leita sökudólga

Jóhanna Sigurðardóttir forsætisráðherra sagði að fagna bæri niðurstöðu Icesave-málsins en ekki leita sökudólga. Það voru stjórnvöld haustið 2008 sem ákváðu að leita samninga við Breta og Hollendinga og annað var ekki í stöðunni fyrir Ísland.

„Ég var sjálf trúuð á málstað Íslands og ekki síst þegar leið á málaferlin hjá EFTA. Þetta er niðurstaðan og við fögnum henni,“ sagði Jóhanna. Hún sagðist þess fullviss að niðurstaðan hefði jákvæð áhrif fyrir Ísland, mundi setja kraft í endurreisnina; lánshæfisfyrirtækin endurskoði hugsanlega sína niðurstöðu og þetta hefði jákvæð áhrif á afnám gjaldeyrishafta.

Þegar hún var spurð hvort ekki væri skrítið að fagna sigri þegar hann væri ekki fyrir atbeina ríkisstjórnarinnar sagði Jóhanna að allir hefðu haft hagsmuni Íslands í huga, meðal annars þegar sest var að samningaborði. „Allir eiga að fagna á þessari stundu en ekki leita að sökudólg.“

Hún sagði að með því að ganga til samninga hefði Ísland fengið alþjóðasamfélagið með í lið. Hefði þessi vilji ekki verið fyrir hendi væri óvíst hvernig hefði farið með endurreisnina, auk þess sem Ísland hafði sjálft ekki stöðu til að sækja málið fyrir dómstólum.