Innlent | mbl | 29.1.2013 | 18:04 | Uppfært 18:34

Vilja að þingmenn segi af sér

Ástþór Magnússon.

„Við erum bara að aðstoða við að koma upp þessari undirskriftasöfnun með okkar tækjum og tækni,“ segir Ástþór Magnússon, fyrrverandi forsetaframbjóðandi, í samtali við mbl.is en undirskriftasöfnun er hafin á netinu á slóðinni www.austurvollur.is þar sem þess er krafist að þingmenn sem studdu síðustu Icesave-samningana eða sátu hjá við afgreiðslu þeirra á Alþingi segi af sér.

Lénið sem söfnunin fer fram undir er skráð á Lýðræðishreyfinguna sem Ástþór hefur farið fyrir og hefur meðal annars verið beitt í þágu framboða hans til embættis forseta Íslands. „Lýðræðishreyfingin er svona samtök lýðræðissinna og margt fólk í henni sem vinnur að beinu lýðræði og tengist mörgum,“ segir hann.

Spurður hverjir standi á bak við undirskriftasöfnunina segir hann það vera hóp manna sem hafi verið að koma saman og í framhaldinu haft samband við Lýðræðishreyfinguna um aðstoð við að koma upp vef fyrir undirskriftasöfnunina. „Það er enginn viss aðili á bak við þetta. Þetta er bara sett í loftið af þessu fólki.“ Aðspurður vildi Ásþór ekki gefa nánar upp hverjir stæðu að undirskriftasöfnuninni en engar upplýsingar er að finna um það á vefsíðunni.

Síðan virkar þannig að þeir sem skrá sig í undirskriftasöfnunina senda um leið staðlað bréf undirritað af viðkomandi til þeirra þingmanna sem studdu síðasta Icesave-samninginn eða sátu hjá.