Nýr Landspítali kosti allt að 85.000 milljónir

Áætlað er að framkvæmdir við byggingu nýs Landspítala kosti um 61.500 milljónir króna og um 73.500 milljónir ef tækjakaupum er bætt við.

Við það bætist fjármagnskostnaður upp á um 20.000 milljónir sem eykur heildarkostnaðinn í um 85.000 milljónir króna, að frádregnum tekjum sem aflað verður með sölu eigna. Á móti kemur að færa má 15.000 milljónir til tekna hjá ríkissjóði vegna vsk. af verkefninu.

Þetta kemur fram í greiningu á umfangi framkvæmdarinnar í fylgiskjali með frumvarpi um stofnun opinbers hlutafélags um byggingu nýs Landspítala við Hringbraut í Reykjavík, en ítarlega er fjallað um mál þetta í Morgunblaðinu í dag. Er skjalið unnið af fjármála- og efnahagsráðuneytinu.