22 íbúar í Auðsholti urðu innlyksa

„Þegar dimmdi var sama staða og fyrr um daginn. Vatnið var ekkert farið að sjatna,“ sagði Steinar Halldórsson, bóndi í Auðsholti 4 í Hrunamannahreppi, á ellefta tímanum í gærkvöldi.

Að sögn Steinars voru þá 22 íbúar í sex íbúðarhúsum innilokaðir vegna flóðs í Hvítá sem fór yfir veginn heim að bænum. Varð vegurinn ófær fólksbílum um tvöleytið á mánudag. Steinar komst yfir ána á jeppa í gær en þurfti frá að hverfa á dráttarvél.

„Við reyndum að fara yfir ána á dráttarvél en snerum við. Það var svo erfitt að sjá stikurnar við veginn sem voru í kafi. Það var öldurót uppi á miðju landi enda orðið hvasst,“ sagði Steinar en um kvöldið var kominn éljagangur.