Bíllinn gjörónýtur - vitna leitað

Eigandi bíls sem kveikt var í í nótt með því að setja logandi flugeld inn í hann, segist nú hafa fengið þær ömurlegu fréttir að bíllinn sé gjörónýtur.

Bíllinn rann til í hálku og hávaðaroki í gærmorgun og festist upp á steyptum kanti við Húsaskóla í Grafarvogi. Þetta vakti athygli ljósmyndara sem voru á ferð í óveðrinu í gær og voru myndir af bílnum birtar í mörgum fjölmiðlum í gær. Eigandinn hafði ætlað að sækja bílinn í dag en í morgun fékk hann símtal frá lögreglunni sem sagði að bíllinn hefði verið dreginn í burtu enda hefði hann stórskemmst í eldi í nótt.

Samkvæmt upplýsingum lögreglunnar var logandi flugeldum komið fyrir í bílnum í nótt og þannig kveikt í honum. Vegfarandi slökkti eldinn með duftslökkvitæki og lögreglan lét svo draga bílinn burt.

Eigandi bílsins sem er stúlka um tvítugt, segist miður sín, enda hafi bíllinn ekki verið kaskótryggður og mun því tjónið allt lenda á henni, ef ekki tekst að hafa hendur í hári þess eða þeirra sem eyðilögðu hann.

Þeir sem geta gefið upplýsingar um atvikið sem átti sér stað um kl. 01.50 í nótt er bent á að hafa samband við lögregluna í síma 444-1100.

Í tilkynningu frá lögreglunni segir að leitað sé vitna vegna rannsóknar á bílbrunanum.

„Þar kviknaði í ljósgrænum Renault Megane Scenic, en vegfarandi náði að slökkva eldinn. Grunur leikur á að kveikt hafi verið í bílnum. Þeir sem geta veitt upplýsingar um málið eru vinsamlegast beðnir um að hafa samband við lögregluna í síma 444-1000. Upplýsingum má einnig koma á framfæri í tölvupósti á netfangið abending@lrh.is,“ segir í tilkynningu lögreglunnar.

Sjá frétt mbl.is: Kveikt í föstum bíl með flugeldum