25 ára vígsluafmæli Breiðholtskirkju

Breiðholtskirkja. mbl.is/Jakob Fannar Sigurðsson

Miðvikudaginn 13. mars eru liðin 25 ár frá vígslu Breiðholtskirkju í Mjódd. Í tilefni þessa vígsluafmælisins verður haldin hátíðarmessa kl. 20:00 að kvöldi þess dags.

Prestar og djákni kirkjunnar þjóna ásamt sóknarnefnd og biskup Íslands, frú Agnes M. Sigurðardóttir, prédikar. Kór kirkjunnar syngur undir stjórn Arnar Magnússonar.

Ásgeir Steingrímsson og Eiríkur Örn Pálsson leika á trompet.

Skólahljómsveit Árbæjar- og Breiðholts leikur létt lög í anddyri kirkjunnar áður en messan hefst.

Boðið verður upp á afmæliskaffi að messu lokinni þar sem m.a. verða sýndar ljósmyndir frá byggingarsögu kirkjunnar og úr safnaðarstarfinu.

 Sunnudaginn 17. mars kl. 20:00 verða síðan afmælistónleikar Kórs Breiðholtskirkju þar sem m.a. verður frumflutt afmælistónverkið „Rennur upp um nótt“ eftir Hróðmar Inga Sigurbjörnsson, tónskáld, við ljóð Ísaks Harðarsonar.

Verkið er samið fyrir kórinn í tilefni af 25 ára vígsluafmælinu og 40 ára afmæli kórsins.

Auk kórsins taka þátt í flutningnum tveir einsöngvarar, þau Marta Guðrún Halldórsdóttir sópransöngkona og Hafsteinn Þórólfsson baritón.

Hljóðfæraleik annast Guðný Einarsdóttir organisti, Sigurður Halldórsson sellóleikari og Elísabet Waage hörpuleikari. Auk þess er leikið á klukkuspil kirkjunnar í verkinu.

Tónleikunum lýkur svo með flutningi á mótettu J.S. Bach „Jesu meine Freude“, sem er eitt af stórverkum tónbókmenntanna og af mörgum talið eitt fegursta verk tónskáldsins.

Stjórnandi á tónleikunum er Örn Magnússon. Aðgangseyrir er kr. 3500.

Heimasíða Breiðholtskirkju