Mjög hvasst sunnanlands

mbl.is/Rax

Áfram verður hvöss austanátt, 15 - 23 m/s með hviðum yfir 35 m/s syðst á landinu í dag og í Öræfum og slydda eða rigning. Annars staðar er austan strekkingur og víða nokkur éljagangur, einkum á fjallvegum en einnig á Austfjörðum, að því er fram kemur í upplýsingum Vegagerðarinnar.

Hálkublettir eru á Mosfellsheiði og snjóþekja á Grafningsvegi en aðrir vegir á Suðurlandi eru að mestu auðir. Óveður er undir Eyjafjöllum og við Vík.

 Á Vesturlandi eru hálkublettir nokkuð  víða en hálka á Fróðárheiði og í Svínadal. Þæfingsfærð og skafrenningur er á Skarðsströnd.

 Hálka eða hálkublettir eru víða á Vestfjörðum og skafrenningur á fjallvegum. Snjóþekja er á Kleifaheiði og Steingrímsfjarðarheiði. Ófært er um Vatnsfjarðarháls í Ísafjarðardjúpi en unnið að hreinsun.

 Á Norðurlandi eru aðalleiðir í Húnavatnssýslum og Skagafirði greiðfærar en hálka eða hálkublettir í Eyjafirði og þar fyrir austan. Skafrenningur er á flestum fjallvegum. Snjóþekja er á Siglufjarðarvegi, Öxnadalsheiði og Víkurskarði.

 Hálkublettir eru víða á Austurlandi og skafrenningur á fjallvegum. Ófært er á Fjarðarheiði og beðið með mokstur vegna veðurs. Snjóþekja og skafrenningur er á Vopnafjarðarheiði, Oddskarði og Vatnsskarði eystra en hálka og skafrenningur á Fagradal.  Snjóþekja er í Berufirði og milli Álftafjarðar og Hafnar.

 Á Suðausturlandi er snjóþekja frá Höfn að Kvískerjum en annars greiðfært. Óveður er í Öræfum.