Fékk ekki undanþágu

Slitastjórn gamla Landsbankans (LBI) hefur farið þess á leit við Seðlabanka Íslands að bankinn veiti LBI undanþágu frá lögum um gjaldeyrismál svo hægt yrði að greiða út til forgangskröfuhafa yfir 200 milljarða í erlendum gjaldeyri sem féll til eftir 12. mars 2012.

Samkvæmt áreiðanlegum heimildum Morgunblaðsins hefur Seðlabankinn hins vegar ekki viljað ljá máls á því að slík undanþága verði veitt á þessari stundu.

Í fréttaskýringu um þetta mál í Morgunblaðinu í dag herma heimildir blaðsins, að óvíst sé hvort Seðlabankinn muni veita heimild fyrir slíkum útgreiðslum meðan ekki hefur tekist að semja um endurfjármögnun eða lengingu á 310 milljarða erlendum skuldabréfum milli gamla og nýja Landsbankans.