„Nú þegar borgarráð hefur samþykkt breytinguna er málið komið til umhverfis- og skipulagssviðs sem mun sjá um framkvæmdina,“ segir Helga Björk Laxdal, skrifstofustjóri borgarstjórnar.
Borgarráð samþykkti einróma tillögur umhverfis- og skipulagsráðs um nöfnin á fundi sínum nýverið. Um er að ræða botnlangagötu út frá Fiskislóð í vesturbæ Reykjavíkur en sú gata mun heita Djúpslóð, í samræmi við önnur götuheiti á svæðinu.
Ein breyting var gerð á gömlu vegheiti. Stekkjarbakki, sem liggur milli hringtorgs við Smiðjuveg í Kópavogi og Höfðabakka, fær nafnið Elliðaárbakki. Í greinargerð með breytingartillögunni er fjallað um að götuheitið Stekkjarbakki hafi verið látið ná yfir tvær götur sem saman mynda 90 gráðu horn sín á milli og tengjast með ljósastýrðum gatnamótum.