„Það gengur bara rosalega vel. Við lentum hérna upp úr miðnætti í gær og mættum síðan klukkan átta í morgun upp á spítala að hitta svæfingalækni og fara í gegnum einhverja hluti. Og nú erum við bara að koma okkur fyrir og versla í matinn og svona,“ segir Guðmundur Felix Grétarsson í samtali við mbl.is en hann missti sem kunnugt er báða handleggi sína í vinnuslysi fyrir um 15 árum síðan. Hann er nú staddur í Lyon í Frakklandi þar sem undirbúningsrannsóknir vegna ágræðslunnar fara fram.

„Þessa viku á ég eftir að klára fleiri hittinga og rannsóknir og eftir það verður væntanlega tekin ákvörðun hvort þeir setja mig á lista strax eða hvort þeir ætli að bíða fram á haustið fram yfir sumarfrí. Ég veit ekki alveg hvernig það verður,“ segir Guðmundur Felix. Það ætti þó að liggja fyrir í lok vikunnar hvert framhaldið verði. „Við erum annars í tímabundnu húsnæði hérna fullbúnu sem við höfum í mánuð á meðan við erum að leita að langtímahúsnæði. Þannig að þetta er svolítið óvíst ennþá hvernig þetta allt saman verður.“

„Ég heyrði það á svæfingalækninum í morgun að þeir séu búnir að hittast oft og spá mikið og spekúlera í þessu. Ég hef rosalega góða tilfinningu fyrir þessu öllu saman,“ segir hann. Læknarnir virki mjög spenntir fyrir þessu. „Þetta er náttúrulega mjög stór aðgerð á alla mælikvarða. Þeir sögðust gjarnan vera að framkvæma aðgerðir í 4-6 tíma en þessi verður líklega allt undir 40 tíma þannig að það er rosalega mikill undirbúningur. Þeir ætla ekkert að klúðra þessu.“

Tengdar fréttir

Guðmundur Felix fær nýja handleggi

Skurðurinn gróinn en missti neglurnar

• „Ég er orðinn helvíti þreyttur“
• Kominn heim af sjúkrahúsinu
• Sannfærður um að allt sé eins og það eigi að vera
• Dansa af gleði eftir góðar fréttir

» Fleiri tengdar fréttir

• Blogga um frétt