Innlent | mbl | 4.7.2013 | 20:29 | Uppfært 21:56

Tveir ráðherrar kosta 180 milljónir

Ráðherrar í nýrri ríkisstjórn eru 10, en í ríkisstjórninni sem fór frá völdum í vor voru 8 ráðherrar. mbl.is/Eggert Jóhannesson

Áætlaður kostnaður við að fjölga ráðherrum um tvo er áætlaður 180 milljónir króna á kjörtímabilinu. Fyrst og fremst er um að ræða launakostnað ráðherra, aðstoðarmanna og annan kostnað. Kostnaður vegna biðlauna í lok kjörtímabils gæti verið 30 milljónir til viðbótar.

Þetta kemur fram í svari Bjarna Benediktssonar, fjármála- og efnahagsráðherra, við fyrirspurn Steingríms J. Sigfússonar, fyrrverandi fjármálaráðherra, um kostnað við fjölgun ráðherra um tvo.

Í fyrirspurninni er spurt um kostnað við að fjölga ráðherrum um tvo. Þegar ríkisstjórnin var mynduð var ráðherrum í ríkisstjórninni fjölgað um einn, þ.e. úr átta í níu. Svarið endurspeglar því ekki raunverulegan kostnað sem fallið hefur til í tíð núverandi ríkisstjórnar.

Fram kemur í svarinu að gerðar hafi verið breytingar á húsnæði ráðuneytanna í kjölfar fjölgunar ráðherranna og er sá kostnaður um 15 milljónir króna. Ekki er áformað að ráða fleiri ráðherrabílstjóra eða ritara vegna fjölgunar ráðherra.