Vegfarendur í miðborg Reykjavíkur ráku margir hverjir upp stór augu þegar þeir komu auga á stóran körfubíl við tónlistar- og ráðstefnuhúsið Hörpu í dag. Virtist sem viðgerðarmenn væru þar að bisa við eina rúðu hússins.
Halldór Jón Hjaltason, yfirumsjónarmaður fasteignarinnar, sagði í samtali við mbl.is að þarna hafi verið að skipta um eina gallaða rúðu. Móða hafi verið innan í henni og því ekki um að annað að ræða en að skipta henni út. Aðeins sé um eðlilegt viðhald að ræða og hafi verkið gengið snurðulaust fyrir sig.