Sauðfjárslátrun stendur nú sem hæst og er ljóst að fallþungi dilka víðast hvar er minni í ár en í fyrra.
Hjá Sláturfélagi Suðurlands á Selfossi er búið að slátra um 45.000 fjár af um hundrað þúsund. Samfelld sláturtíð hófst 10. september og stendur til 8. nóvember. Meðalvigtin er í kringum 15,9 kg, það er um 400 grömmum léttara en í fyrra, að því er fram kemur í umfjöllun um mál þetta í Morgunblaðinu í dag.
Hjá Sláturhúsi KS á Sauðárkróki er meðalvigtin 16 kg, ívið minni en í fyrra. Hjá Sláturhúsi KVH á Hvammstanga er hún 16,2 kg en á sama tíma í fyrra var hún tæp 17 kg. Hjá Norðlenska á Húsavík og Fjallalambi á Kópaskeri er meðalvigtin betri en í fyrra.