Hamlet í kústaskáp

„Vilji einhver leika Hamlet hér inni gerir hann það,“ segir Guðmundur Ingi Þorvaldsson, nýráðinn framkvæmdastjóri Tjarnarbíós, og horfir inn í kústaskáp í leikhúsinu.

Guðmundur ætlar að fylla hvert einasta hólf hússins af spriklandi sköpun. Bræða saman listgreinar og eiga í samtali við þjóðfélagið sem við búum í. Í hans huga eru leikhús með sviði og sætum ágæt til síns brúks en fjarri því eina leiðin til að fremja leiklist. Raunar forðast hann að nota orðið „leiklist“, talar þess í stað um „hinar lifandi listir“. Þar á hann við leiklist, myndlist, tónlist, ritlist. Hvaðeina. Og ekki bara listir. Hann vill fá fólk úr öllum mögulegum greinum inn í húsið, kraftlyftingamenn, járnsmiði, pípara og jafnvel blaðamenn. Sköpunin þekkir engin takmörk.

Reykjavíkurborg hefur um skeið haft áhuga á starfseminni og sýndi í vikunni viljann í verki þegar undirritaður var samstarfssamningur til þriggja ára sem tryggir Tjarnarbíói tíu milljónir króna í rekstrarfé á ári. Nokkuð sem Guðmundur segir skipta sköpum fyrir starfsemina. Í samningnum er gert ráð fyrir því að Tjarnarbíó þjónusti fjóra til sex leikhópa á ári. Guðmundur mun velja verkefnin ásamt þriggja manna stjórn Tjarnarbíós. Hefur þar jafnt vægi á við hina.

Rætt er við Guðmund Inga í sunnudagsblaði Morgunblaðsins.