Lést á gjörgæsludeild LSH

Átján ára karlmaður lést á gjörgæsludeild Landspítalans í dag en hann lenti í bílslysi á Vesturlandsvegi við Fornahvamm í Norðurárdal sunnudaginn 12. janúar síðastliðinn. Síðan þá hafði hann háð erfiða baráttu sem lauk á þriðja tímanum í dag.

Maðurinn, Skarphéðinn Andri Kristjánsson, var fæddur 1. mars 1995. Hann bjó á Sauðárkróki þar sem hann stundaði nám og var unnusti ungrar konu sem einnig lést í slysinu.

Maðurinn var ökumaður fólksbifreiðar sem lenti í árekstri við flutningabifreið sem kom á móti. Að sögn lögreglu var hálka og skafrenningur þegar slysið átti sér stað. Slysið bar að með þeim hætti að fólksbifreiðin rann í veg fyrir flutningabifreiðina. Slysið varð á beinum vegarkafla nærri brúnni við Fornahvamm.

Samkvæmt upplýsingum frá móður Skarphéðins hefur þegar verið haft samband við sjúkrahús í Svíþjóð þar sem líffæri Skarphéðins verða öðrum til góðs.