Blaðamannafélag Íslands og Samtök atvinnulífsins, sem fara með samningsumboð fyrir Árvakur, 365 og RÚV, hafa undirritað kjarasamning, en skrifað var undir samkomulagið í húsi ríkissáttasemjara í morgun. Þetta er fyrsti samningurinn sem er undirritaður í Karphúsinu á þessu ári.

Samningarnir eru í öllum aðalatriðum samhljóða þeim aðfarasamningi sem Alþýðusamband Íslands og Samtök atvinnulífsins gerðu með sér í desember.

Hjálmar Jónsson, formaður Blaðamannafélags Íslands, segir að samningurinn sé í anda þess sem samið hafi verið um í samfélaginu að undanförnu.

„Þetta er aðfarasamningur að lengri samningi og inniber sömu hækkanir [2,8% almenna launahækkun] frá fyrsta janúar og þeir samningar sem hafa verið gerðir við Alþýðusambandið,“ segir Hjálmar í samtali við mbl.is.

„Við töldum að það væri skynsamlegt að klára þessa samninga og nota tímann til fram að næstu samningum,“ segir Hjálmar, en samningurinn gildir til ársloka 2014.

Hann segir mikilvægt að tíminn verði vel nýttur og „tryggja okkar félagsmönnum þessa hækkun frekar heldur en að lenda inni í einhverri hringiðu og þrasi“, segir hann ennfremur.

Hjálmar á von á því að samningurinn verði borinn undir atkvæði félagsmanna í næstu viku.

Í lok janúar voru nýir kjarasamningar Blaðamannafélags Íslands við Fréttatímann, DV og Birting samþykktir með yfirgnæfandi meirihluta atkvæða á almennum félagsfundum á fjölmiðlunum. 

Tengdar fréttir

Kjarasamningar SA og ASÍ

Verkalýðshreyfingin tilbúin ef aðrir verða það

• Vilja skoða sameiginleg samningsmarkmið
• Viðburðarík vika fram undan í deilunni
• Forseti ASÍ: Engin pressa frá Eflingu
• Vinir Kópavogs láta ekki deigan síga

» Fleiri tengdar fréttir

• Blogga um frétt