Sjálfstæðisflokkur leiði í innflytjendamálum

Sjálfstæðisflokkurinn nýtur mests trausts til að leiða í innflytjendamálum og endurskoðun á stjórnarskránni, ef marka má nýja könnun MMR á afstöðu fólks til þess hvaða stjórnmálaflokka það teldi best til þess fallna að leiða fjóra málaflokka sem stjórnvöld þurfa eða gætu þurft að fást við á næstu mánuðum.

Af þeim sem tóku afstöðu töldu 32,0% að Sjálfstæðisflokkurinn væri best til þess fallinn að leiða í innflytjendamálum og 24,6% töldu að Sjálfstæðisflokkurinn væri best til þess falinn að leiða endurskoðun á stjórnarskránni.

Þá treystu flestir nýju flokkunum tveimur, Pírötum og Bjartri framtíð, til að leiða rannsókn á tildrögum bankahrunsins. Af þeim sem tóku afstöðu töldu 21,0% að Píratar væru best til þess fallnir að leiða þá rannsókn og 19,4% töldu að Björt framtíð væri best til þess fallin. Til samanburðar töldu 15,8% að Sjálfstæðisflokkurinn væri best til þess fallinn að leiða málaflokkinn og 12,6% töldu Framsóknarflokkinn bestan til þess fallinn.

Könnunin var framkvæmd dagana 9. til 15. janúar 2014 og var heildarfjöldi svarenda 981 einstaklingar, 18 ára og eldri.

Könnun MMR

• 1 blogg um fréttina

Bloggað um fréttina

• Páll Vilhjálmsson: Hanna Birna fær stuðningsyfirlýsingu kjósenda