Innlent | mbl | 23.3.2014 | 8:50 | Uppfært 11:49

Íslenskir eftirlitsmenn til Úkraínu

Gunnar Bragi Sveinsson utanríkisráðherra

Gunnar Bragi Sveinsson utanríkisráðherra segir brýnt að tryggja frið í samskiptum Úkraínu og Rússlands og að sátt ríki um umbætur í Úkraínu en miklar og sársaukafullar endurbætur á efnahags- og stjórnkerfi landsins séu óumflýjanlegar.

Í dag lauk heimsókn hans til höfuðborgar landsins, Kænugarðs, þar sem hann átti fundi með ráðamönnum, fulltrúum frjálsra félagasamtaka og starfsmönnum Öryggis- og samvinnustofnunar Evrópu (ÖSE).

Á fundi með Andrii Deshchytsia, starfandi utanríkisráðherra Úkraínu, staðfesti Gunnar Bragi að Ísland hygðist taka þátt í eftirlitsveit ÖSE í Úkraínu sem verið er að setja á laggirnar.

Áhrifamikið að koma á Frelsistorgið

Í ferðinni kom Gunnar Bragi einnig á Sjálfstæðistorgið, þar sem um 100 manns féllu í mótmælum í síðasta mánuði.

„Það var afar áhrifamikil upplifun að koma þar sem svo margir létu lífið og að hitta mótmælendur, sem segjast munu hvergi fara, fyrr en þeir telja tryggt að breytingar verði til frambúðar,“ er haft eftir Gunnari Braga í tilkynningu frá utanríkisráðuneytinu.

„Það er ljóst að Úkraínumanna bíður risavaxið verkefni við að tryggja stöðugleika og takast á við gríðarlegan efnahagsvanda. Ég fékk ágæta mynd af stöðu mála og hvatti bæði stjórn og stjórnarandstöðu til að vinna að efnahagsumbótum, takast á við spillingu, tryggja mannréttindi, málfrelsi og réttindi minnihlutahópa,“ segir Gunnar Bragi.

Þakkaði stuðning Íslendinga

Á fundi Gunnars Braga og Andriis Deshchytsia ræddu þeir ástandið á Krímskaga og mikilvægi þess að alþjóðasamfélagið hjálpaði Úkraínu að tryggja frið og öryggi í landinu. Þá ræddu þeir efnahagsmál, þátt alþjóðagjaldeyrissjóðsins og stöðu þjóðarbrota í landinu.

Deshchytsia þakkaði Íslendingum sérstaklega fyrir afdráttarlausan stuðning þeirra við Úkraínu. Hann sagði stuðning hverrar og einnar þjóðar mikilvægt lóð á vogarskálarnar til að tryggja frið og stuðla að þeirri uppbyggingu og endurbótum sem svo mikil þörf væri á. Deshchytsia, sem tók við embætti fyrir tæpum mánuði, var sendiherra Úkraínu gagnvart Íslandi 2008-2012.

Erfið staða Úkraínu

Fyrr um daginn fundaði utanríkisráðherra með þingmönnum Flokks héraðanna, Yuri Miroshnychenko og Serhiy Tihipko, starfandi seðlabankastjóra landsins, Stepan Kubiv, sem er fyrrverandi þingmaður Föðurlandsflokksins, fulltrúum frjálsra félagasamtaka sem berjast fyrir gagnsæi í stjórnsýslu og fyrir réttindum samkynhneigðra og yfirmanni fastaskrifstofu ÖSE í Kænugarði.

„Samtöl mín í ferðinni staðfesta hvað staða Úkraínu er erfið. Það var gerð innrás í landið og hér eru miklar áhyggjur af því hver verði næstu áform Rússa. Þá voru viðmælendur mínir almennt sammála um að miklu skipti að tryggja stöðugleika, draga úr spillingu sem hafi verið undirrót óánægju almennings sem byggi við bág kjör. Erfiðar og umfangsmiklar endurbætur á stjórnkerfi og í efnahagsmálum væru óumflýjanlegar en til þeirra yrði að grípa til að koma á stöðugleika í landinu.“