Bæjarráð Hafnarfjarðar fól bæjarstjóra í síðustu viku að gera ráðstafanir til að virkja forkaupsrétt Hafnarfjarðar vegna sölu á frystitogaranum Þór með aflaheimildum úr sveitarfélaginu.
Guðrún Ágústa Guðmundsdóttir bæjarstjóri segir að í samþykktinni felist heimild til að vinna málið áfram lögfræðilega og leita til dómstóla ef nauðsyn krefji.
Í fréttaskýringu um mál þetta í Morgunblaðinu í dag segir hún að bærinn hafi sem forkaupsréttarhafi sex mánuði frá því að vitneskja barst um söluna til að krefjast þess að hún verði ógilt. Að minnsta kosti tveir hópar í Hafnarfirði hafi sýnt áhuga á aflaheimildunum. Enn sé þó ekki fullreynt hvort sjónarmið bæjarins verði viðurkennd í sjávarútvegsráðuneytinu.