Suðvestan vindurinn sem gengið hefur yfir landið er hægt og bítandi að ganga niður, en þó ekki markvert fyrr en síðdegis. Él verða um vestanvert landið og víða einhver skafrenningur á fjallvegum. Kólnar á láglendi í kvöld og myndast ísing á vegum suðvestan- og vestanlands, að því er fram kemur í tilkynningu frá Vegagerðinni.
Hálka er á Hellisheiði en hálkublettir á Mosfellsheiði og sumstaðar á útvegum á Suðurlandi þótt þar sé víðast greiðfært.
Á Vesturlandi eru hálkublettir á flestum fjallvegum en greiðfært á láglendi. Á Holtavörðuheiði er snjóþekja, hvassviðri og skafrenningur.
Á Vestfjörðum er mikið autt á láglendi en víða nokkur hálka eða snjóþekja og skafrenningur á fjallvegum. Vegurinn norður á Árneshrepp er þungfær.
Á Norðurlandi eru flestir vegir greiðfærir. Þó er snjóþekja og skafrenningur á Þverárfjalli en hálkublettir m.a. á Vatnsskarði, Öxnadalsheiði og Víkurskarði.
Opið er yfir Mývatns- og Möðrudalsöræfi og um Vopnafjarðarheiði en þar eru hálkublettir og snjóþekja. Vegir á Austurlandi eru annars greiðfærir.
Vegir eru auðir á Suðausturlandi en sandfok er í Hvalnesi.