Spellvirki á biðskýlum og biðstöðvartöflum strætó hefur færst í aukana á undanförnum misserum, að sögn Júlíu Þorvaldsdóttur, sviðsstjóra farþegaþjónustusviðs Strætó bs.
„Það er einstaklega dapurlegt að verða vitni að þessu og nú virðist vera einhvers konar hrina í gangi þar sem skemmdir eru unnar með kroti og öðrum hætti á eignum sveitarfélaganna svo stórsér á,“ segir Júlía í Morgunblaðinu í dag.
Kostnaður vegna eignaspjalla á biðskýlum borgarinnar liggur ekki fyrir en ljóst er að hann er töluverður þar sem ástandið hefur aldrei verið verra að sögn Júlíu. „Við gerum ekki samanburð milli ára en starfsmenn sem annast hafa biðskýlin í fjölda ára hjá okkur fullvissa mig um að ástandið hafi aldrei verið verra.“