Ökumaður í Borgarnesi ók bílnum sínum beinustu leið inn í bílskúr við húsi í Þorsteinsgötu rétt fyrir klukkan níu á páskadagsmorgun í gær. Greint er frá málinu í frétt á vef Skessuhorns.
Að sögn lögreglu blindaðist ökumaðurinn af sól sem var lágt á lofti þennan morgun með þeim afleiðingum að hann missti stjórn á bílnum sem fór beinustu leið yfir grindverk og inn í bílskúrinn. Nokkuð tjón varð á bílskúrnum og á grindverki, að því er segir í fréttinni, en einnig urðu skemmdir á bílnum sem ekið var og á bíl sem var inn í bílskúrnum.
Ökumann sakaði ekki. Málið telst upplýst að sögn lögreglu.