Sigurður Ingi Jóhannsson sjávarútvegs- og landbúnaðarráðherra hefur ákveðið heildarafla makríls  fyrir árið 2014 og nemur hann 147.721 tonni eða um 16,6% af ráðgjöf Alþjóða hafrannsóknaráðsins(ICES) sem er 889.886 tonn.

Í tilkynningu frá atvinnuvegaráðuneytinu segir, að þetta samrýmist þeirri kröfu sem Ísland hafði uppi í samningaviðræðum um skiptingu makrílkvótans.

Haft er eftir Sigurði Inga Jóhannssyni, sjávarútvegsráðherra, að ákvörðun Íslands um veiði sýni að Íslendingar miði við og vilji stunda ábyrgar veiðar. „Hér eftir sem hingað til munum við gera okkar allra besta til að ná sanngjörnum samningi um veiðar á makríl við öll hin strandríkin - en sá samningur mun ekki geta grundvallast á veiðum langt umfram ráðgjöf vísindamanna. Heildaraflinn er í góðu samræmi við það sem við kröfðumst í samningaviðræðum um skiptingu kvótans.“

Samhliða þessari ákvörðun hefur ráðherra undirritað reglugerð um makrílveiðar íslenskra skipa árið 2014. Þar er leyfilegum heildarafla skipt á milli skipaflokka þannig; til smábáta 6.000 tonn, til ísfiskskipa 7.917 tonn, til frystitogara 30.682 tonn og til uppsjávarskipa 103.121 tonn. Gert er ráð fyrir að fyrirkomulag veiða verði að öðru leyti sambærilegt og á síðasta ári.
Í nýgerðum makrílsamningi Evrópusambandsins, Noregs og Færeyja ætla þessar þjóðir sér heildarafla í ár langt umfram heildarveiðiráðgjöf ICES. Miðað við 1.240 þúsund tonna heildarveiði nemur 148 þúsund tonna afli Íslands 11,9% af heildarafla samkvæmt samningnum.
 

Tengdar fréttir

Makrílveiðar

Munu reyna til hins ýtrasta að ná samkomulagi

• Samkomulag um ráðgjöf en ekki um veiði
• Leggja til 24% samdrátt í síldarkvóta
• Vilja viðskiptaaðgerðir gegn Noregi og Færeyjum
• „Við höfum ekkert gaman af svartsýni“

» Fleiri tengdar fréttir

• Blogga um frétt