Flugrákir, nýtt verk eftir Ragnheiði Hörpu Leifsdóttur verður lokaverk Listahátíðar Reykjavíkur 2014. Verkið verður ekki flutt í dag eins og til stóð heldur á morgun, föstudag, klukkan 17:45. Áhorfendum er bent á að safnast saman við Sólfarið á Sæbrautinni. Þetta kemur fram í tilkynningu frá Listahátíð.
Verkið tekst á loft, í bókstaflegri merkingu, yfir Kollafirði. Tvær listflugvélar teikna form innblásið af bylgjum Guðseindarinnar, sem er einnig þekkt sem Higgs-ögnin. Samtímis mun Kvennakórinn Katla túlka ferðalag flugvélanna og verður þeim söng útvarpað beint á Rás 1. Söngurinn vísar til sönglína frumbyggja Ástralíu sem líta svo á að land sé lifandi og til að halda því á lífi þurfi að „syngja það fram“.
„Hægt verður að njóta verksins víða á höfuðborgarsvæðinu en við mælum með því að njóta verksins við Sæbrautina og ekki gleyma að stilla vasadiskóin eða snjallsímana á RÁS 1,“ samkvæmt fréttatilkynningu.